-
José Lista e Juan de Dios Martín pechan o acordo que permitirá que os membros da institución empreguen a innovadora solución ideada polo colectivo de áridos
-
A ferramenta tecnolóxica, que controla a trazabilidade dos explosivos para garantir a seguridade civil, está a ser usada por máis de 300 canteiras de toda España
A Asociación Galega de Áridos (AGA) e a Cámara Oficial Mineira de Galicia (COMG) veñen de asinar un convenio para a xestión da trazabilidade de explosivos en canteiras e minas da comunidade a través do emprego da ferramenta informática Atrazex, ideada e desenvolta pola AGA. O presidente de AGA, José Lista, e o da COMG, Juan de Dios Martín, rubricaron o acordo, que permitirá que os membros desta entidade empreguen a innovadora solución, destinada a controlar os explosivos por medio das novas tecnoloxías para garantir a seguridade civil.
Deste xeito, Atrazex segue co seu rápido proceso de expansión, que permite que xa estea a ser utilizada por máis de 300 canteiras de toda España e por numerosos colectivos e patronais do sector ata copar aproximadamente a metade do mercado nacional malia que leva pouco máis dun ano en funcionamento.
«Estamos moi satisfeitos de ter asinado este convenio coa Cámara Mineira, coa que mantemos unha inmellorable relación e un contacto moi fluído, porque amosa ben ás claras que a aposta e o inxenio de AGA con Atrazex foi un acerto pleno que coloca ao sector dos áridos galego como pioneiro e vangardista en materia de innovación e de seguridade respecto ao emprego de explosivos. Nembargantes, este é só un exemplo do traballo e do liderado que AGA está a amosar no seo do sector en toda España», explicou José Lista.
