Arigal esixe o cambio do modelo produtivo para igualar o consumo de áridos ao europeo

Arigal esixe o cambio do modelo produtivo para igualar o consumo de áridos ao europeo

  • O colectivo quere que as administracións promovan actuacións que eleven o consumo de áridos, situado en 2,25 toneladas por habitante ao ano, á media europea, de 5,10
  • A Asociación Galega de Áridos celebrará a súa asamblea o 29 de abril nun dos seus «peores momentos históricos» e reclamará a revitalización da licitación de obra pública

A Asociación Galega de Áridos (AGA) vai esixir, durante a súa asamblea anual, o cambio do actual modelo produtivo e económico para tratar de igualar o consumo de áridos, actualmente estancado, ás cifras medias de Europa. Neste senso, AGA revela que a media galega sitúase nunha cifra moi baixa, de apenas 2,25 toneladas por habitante ao ano, mentres que o índice europeo está en 5,10 toneladas por habitante ao ano.

 

O colectivo dos áridos asegura que, tras anos de continuos descensos, vivíuse un repunte en 2015 con crecementos moi lixeiros de emprego e producción de áridos, pero neste primeiro cuatrimestre do ano estase a padecer a mesma mala situación dos últimos anos a maior escala. «Estamos nun dos peores momentos históricos para o sector dos áridos», sinalan dende a directiva para reclamar un cambio  do modelo produtivo, que poña en valor a importancia dos áridos, e tamén para pedir a revitalización do consumo dos mesmos tanto a través dunha maior licitación de obra pública, completamente parada en 2016, como doutros cambios de carácter estrutural na economía.

 

Esta cuestión abordarase na asamblea xeral do colectivo que terá lugar, conxuntamente coa presentación da súa primeira memoria anual de actividades editada, correspondente ao ano 2015, o vindeiro venres 29 de abril ás 11.30 horas –en segunda convocatoria– no hotel Puerta del Camino, en Santiago de Compostela.

 

AGA ten confirmada a presenza nesta xuntanza anual de Ethel Vázquez, conselleira de Infraestruturas; Ines Santé, directora do Instituto de Estudos do Territorio; Antonio Dieter Moure, presidente da CEG; Maria Araújo, subdirectora da Escola de Minas; e Angel Bernardo Tahoces, director xeral de Enerxía e Minas. Precisamente á conselleira e ao director xeral trasladaráselle de primeira man a preocupación pola baixa licitación de obra pública, pero tamén o agradecemento pola defensa do sector realizada este mesmo mes na comisión de Industria do Parlamento.

 

«Estamos de acordo coa postura do director xeral manifestada no Parlamento e compartimos a súa defensa do sector porque cremos que é o camiño para que a sociedade se dea conta de que as canteiras, e actividade extractiva en Xeral, existen única e exclusivamente para extraer os materiais necesarios para construír estradas, hospitais, colexios ou vivendas. Somos clave no progreso e ás veces detúrpase inxustamente a nosa imaxe, xa que nós somos os primeiros en defender unha minería responsable e sostible», explicaron dende a xunta directiva de AGA.

 

 

Finalmente, en canto á asamblea, tras abordar os aspectos máis formais da asociación, coma os presupostos, estado de altas e baixas e a revisión dos estatutos, procederase á presentación e aprobación da memoria anual de actividades 2015. Este documento, de 64 páxinas, editouse por vez primeira na historia de AGA con información corporativa e dos principais fitos do exercicio. Para concluír a asamblea, haberá intervención das autoridades presentes e un xantar de traballo.

SOBRE ARIGAL

A Asociación Galega de Áridos (Arigal) é unha organización empresarial galega integrada por máis de 73 empresas que desevolven a súa actividade nas distintas áreas do sector dos áridos: industria, fabricación, tratamento e distribución. En total, as firmas asociadas operan en 75 centros de actividade e xeran arredor de 3.600 postos de traballo, entre empregos directos e indirectos. No exercicio de 2022 os asociados de Arigal sumaron unha cifra de negocio conxunta de 46,5 millóns de euros.

 

Boletín informativo

Súmate aos centos de persoas que reciben o noso boletín informativo Arigal Novas enviándonos un correo electrónico coa túa solicitude ao seguinte enderezo: info@arigal.gal