Múltiples proxectos ambientais de canteiras galegas recuperan espazos para o agro, a industria, os servizos e o lecer

Múltiples proxectos ambientais de canteiras galegas recuperan espazos para o agro, a industria, os servizos e o lecer

Ata unha decena de proxectos de restauración ambiental de actividades extractivas galegas, algunhas delas pertencentes á Asociación Galega de Áridos (Arigal), están a recuperar para a sociedade espazos excavados que acadan unha segunda vida útil destinada ao agro, a industria, os servizos e o lecer.

 

Deste xeito, e con accións tan significativas como a premiada lagoa de Begonte, o lago das Pontes ou a construción do Pazo da Ópera da Coruña nunha canteira, entre outros exemplos, o sector extractivo contribúe con accións medioambientais ao beneficio da cidadanía baixo a filosofía de minería sostible e responsable, polo que se sitúa á cabeza de Europa en rehabilitacións ambientais de espazos afectados polo aproveitamento de recursos minerais naturais. Dentro do sector dos áridos, os principais proxectos desenvolvidos ou en marcha son os seguintes:

  • Mina Frades (Mesía). Revexetación dunha mina de cuarzo para favorecer o seu uso agrícola.
  • Mina Urxeira (Salvaterra). Recuperación dunha mina de áridos para destinala a construcións de carácter industrial.
  • Mina Villalba (Begonte). Revexetación e creación dunha lagoa por medio da integración ambiental dunha canteira de cuarzo. Este proxecto de Erimsa acadou o primeiro premio na categoría medioambiental da Federación de Áridos en 2015 e aspira aos galardóns europeos no presente exercicio.
  • Mina Sonia (Mañón). Forte aposta pola revexetación neste espazo de extración de cuarzo para impulsar a integración ambiental da contorna con 25 anos continuados a prol da restauración, polo que constitúe un bo exemplo a prol da biodiversidade de flora e fauna, con especial relevancia no que atinxe aos brezais húmidos atlánticos.

Utilidade dos áridos

Sen esquecer en ningún momento a filosofía de minería sostible e responsable, tamén impulsada pola Cámara Mineira de Galicia, que defende a satisfacción das necesidades da poboación actual sen comprometer a capacidade de xeracións futuras, dende a Asociación Galega de Áridos faise fincapé en que a evolución tecnolóxica do mundo actual está asociada indubidablemente aos avances nas técnicas mineiras. Así, o colectivo lembra que a práctica totalidade das infraestruturas que utilizamos na vida diaria están conformadas por áridos. Estes materiais son imprescindibles para levantar estradas, vías férreas, hospitais, centros educativos e de servizos ou vivendas, así como para elaborar cristais de gafas, pasta de dentes ou vaixelas, entre outros.

 

 

A modo de exemplo, AGA explica que para a construción das seguintes infraestruturas precísanse dos seguintes volumes de áridos:

Un quilómetro de estrada: 10.000 toneladas

Un quilómetro de autovía: 30.000 toneladas

- Un metro cúbico de formigón: 2 toneladas

Un quilómetro de vía férrea: 10.000 toneladas

Unha vivenda unifamiliar: 100-300 toneladas

Un hospital: 20.000-40.000 toneladas

 

 

«Cremos que a importancia dos áridos é máis que constatable tanto na creación de infraestruturas e obxectos como na evolución tecnolóxica que mellora a calidade de vida da nosa sociedade. Por elo, cremos que somos un sector que debe ser recoñecido, especialmente cando, como sucede en Galicia, actuamos co máximo respecto ao territorio baseamos  a  nosa  actividade  empresarial  na  busca  dun  rendemento  económico  e  na creación de emprego pero tamén na consecución da sostibilidade e a defensa medioambiental», sinala a xunta directiva de Arigal.

 

 

 

 

 

SOBRE ARIGAL

A Asociación Galega de Áridos (Arigal) é unha organización empresarial galega integrada por máis de 73 empresas que desevolven a súa actividade nas distintas áreas do sector dos áridos: industria, fabricación, tratamento e distribución. En total, as firmas asociadas operan en 75 centros de actividade e xeran arredor de 3.600 postos de traballo, entre empregos directos e indirectos. No exercicio de 2022 os asociados de Arigal sumaron unha cifra de negocio conxunta de 46,5 millóns de euros.

 

Boletín informativo

Súmate aos centos de persoas que reciben o noso boletín informativo Arigal Novas enviándonos un correo electrónico coa túa solicitude ao seguinte enderezo: info@arigal.gal